Styrktarhlaup á Króknum

Stuðningshlaup Hlaupahópsins 550 rammvilltar tókst afar vel og fjölmargir Sauðkrækingar tóku þátt í hlaupinu eða
studdu það með fjárframlagi.
/Mynd: Hjalti Árnason.

Á Sauðárkrók tók nýstofnaður hlaupahópur, Hlaupahópurinn 550 rammvilltar, Áslaugu Örnu Sigurbjörnsdóttur, háskóla-, iðnaðar- og nýsköpunarráðherra, og systkin hennar sér til fyrirmyndar og efndi til styrktarhlaups til stuðnings Einstökum börnum þann 1. maí síðastliðinn.

Hlaupið fór fram í heimabæ hlaupahópsins, Sauðárkróki, þar sem yfir 100 manns mættu til að hlaupa, ganga og njóta útiverunnar saman í blíðskaparveðri eins og sést á myndinni sem Ragnhildur Friðriksdóttir sendi okkur. Nokkur „Einstök börn“ mættu í hlaupið og var það sérstaklega ánægjulegt. Mörg börn, sem eru auðvitað einnig einstök, tóku þátt í hlaupinu til að styðja langveika félaga sína. Hafi þau bestu þakkir fyrir. 

Hlaupið þótti ákaflega vel heppnað, svo að ákveðið var að endurtaka leikinn að ári. Hlaupahópurinn 550 rammvilltar hlakkar mikið til að geta stutt Einstök börn áfram með hjálp bæjarbúa.

Einstök börn þakka Hlaupahópnum 550 rammvilltum hjartanlega fyrir hlýhuginn og framtakssemina. Þessi myndarlegi stuðningur mun svo sannarlega nýtast „Einstökum börnunum“ okkar afar vel.