Foreldrastarf í þágu farsældar barna

Þorvar Hafsteinsson, formaður Heimilis og skóla og Ásmundur Einar Daðason, mennta- og barnamálaráðherra, undirrita samninginn.

Heimili og skóli, landssamtök foreldra, fengu fjárstyrk fyrir þetta ár til að efla starf foreldra í þágu farsældar barna. Ásmundur Einar Daðason, mennta- og barnamálaráðherra undirritaði samning þar um fyrir hönd stjórnvalda.

„Merki eru um að dregið hafi verulega úr virku samstarfi heimila og skóla um allt land á undanförnum árum,“ segir Ásmundur Einar. „Sporna þarf við þessari þróun og efla og þróa þetta mikilvæga starf um land allt á öllum skólastigum í kjölfar heimsfaraldurs. Virk þátttaka foreldra frá upphafi leikskóla og stuðningur þeirra er lykilþáttur í forvörnum, mótun á jákvæðum skólabrag og í að takast á við áskoranir sem tengjast skólagöngu og frístundum barna frá öllum hliðum. Miklar vonir eru bundnar við að þessi stuðningur við Heimili og skóla nýtist til að endurreisa og efla foreldrastarf í samstarfi við alla helstu lykilaðila skólasamfélagsins.“

Tilvitnunin er fengin úr frétt mennta- og barnamálaráðuneytisins þar sem lesa má um forsendur samningsins og tilgang hans.